來自多倫多、有「翻版林熙蕾」之稱的應屆「國際中華小姐」冠軍苟芸慧，原來由選美至入行，全因償父母心願，雖然她本身對娛樂圈生活未有太大憧憬，但凡事要做到最好的她，表示難得入行，定必盡力。

愛周星馳

苟芸慧表示由參選到入行，都係爸爸媽媽鼓勵，而她本身並未有入行打算，她謂：「可能佢哋嘅人生好無聊，佢哋希望我嘅生活可以多姿多采，所以佢哋好支持我加入娛樂圈，因為唔係個個可以試，不過起初我真係唔係太想試。（加入大染缸，怕唔怕受污染？）唔怕，屋企人一向都好信任我，以往喺屋企都係由我照顧細佬妹，所以我好成熟，不會咁易受感染。（加入娛樂圈最想做啲乜？）當然想試吓唔同角色，最想演浪漫喜劇，因為我好鍾意見到人笑，而我就好鍾意周星馳，覺得佢好有天分。」

樂做翻版

對於被稱做「翻版林熙蕾」，苟芸慧坦言並不介意：「人哋咁叫我，我會幾開心，因為林熙蕾係公認嘅靚女。（驚唔驚孭住人哋影子？）唔驚，我有我嘅特別之處，唔會一模一樣。（成就想唔想超越林熙蕾？）冇諗咁多，都要睇際遇，不過我會畀心機，現時最重要係學習，對所有嘢都係平常心，唔會畀太大壓力自己。」

文：影視組

場地：馬哥孛羅香港酒店（CUCINA）

服裝：Joseph、Sinequanone