憑電影《愛出貓》結片緣的陳偉霆、何尚謙、林司敏及詩雅，私底下其實老友鬼鬼。William笑謂不用埋位期間，一眾演員包括鄧紫棋（G.E.M.）、李蘊及小肥經常玩killer打發時間，而且每次輸家都要接受慘無人道的大懲罰：「我記得當時現場有成百幾個臨時演員，我哋就罰個輸咗嘅李蘊要喺roll機之後，企喺度向在場嘅男工作人員大叫『我愛你』，佢真係照做喎，真係好瘋狂。」在旁的詩雅即插嘴謂：「啲咁恐怖嘅大懲罰，全部都係William諗出嚟㗎！」

James最賴皮

詩雅又踢爆在眾人當中，以小肥和James最「賴皮」：「小肥次次玩之前，都會問個懲罰係乜，如果覺得好離譜嘅，佢就縮沙咯。至於James，有次明明佢要喺一大班臨時演員中揀個女仔嚟問電話號碼，但佢就到依家都未問咯。」

James聞言即急忙「狡辯」：「雖然我失聲但都要澄清，其實我係想等齊人先攞嘛，結果我哋一直都唔齊人，咪冇問咯，哈哈！」

會考當拍戲

James的賴皮程度，就連師妹Ciwi亦忍俊不禁，笑指他搵藉口。另剛考完會考的Ciwi亦透露，由於經常有會考的拍攝場口，所以令她正式會考時幾乎以為自己在拍戲：「有場戲話我哋用隱形墨水出貓，點知第二日我正式會考嘅時候，個考官就警告我哋唔好用隱形墨水，搞到我以為仲喺度拍緊戲。」

文：專案組

攝：沈健程