突然「升呢」變郭富城緋聞女友的王秀琳（Mango），昨日毫不避嫌承認與城城仍有來往，對城城行蹤更瞭如指掌，但竟不知熊黛林（Lynn）與城城拍拖，看來視阿Lynn這個「天王嫂」透明。
踢走熊黛林榮升城城「車女郎」的Mango，昨日以圓領低胸騷性感出席遊戲機首賣會活動，自被揭獲城城駕名車接載後的Mango，明顯心情大靚，問到可試過在城城家中打遊戲機時，她竟說：「唔知呀！」記者指城城剛於早上出發到泰國北部探訪，Mango似是對城城行蹤瞭如指掌：「我知呀。（城城話你知？）我哋有聯絡。」
保持關係毫不忌諱
Mango不諱言與城城關係是朋友，對當日被拍到她跳車而逃，Mango解釋：「嗰日唔係好似今日咁打扮過，有記者走埋嚟影，係自然嘅反應。（令城城惹緋聞？）做朋友搞到咁都唔好意思。」至於城城會否因怕緋聞不敢找她？Mango信心十足：「咁又冇，我哋有聯絡，尤其佢見過咁多嘢，冇話怕唔怕，做朋友邊計得咁多。」
不過，當問到可知Lynn與城城拍拖時，Mango竟說：「我都唔知。（做第三者？）第三者都係記者寫。（形容城城『偷杧』？）呢個字眼好核突，係記者亂作。」Mango稱與阿Lynn多年前有一面之緣，卻不熟絡。問她可怕與Lynn合照？她說：「唔怕，有乜好怕呀！」
發燒求診疑豬流感
Mango稱現時沒有男朋友，對於做城城女朋友則未有想過。她又指前晚從台灣返港，因發燒和喉嚨不適漏夜求診，雖醫生指她有機會患「豬流感」，但認為不用檢驗只需服藥便可。
至於城城昨晨現身機場出發到泰國探訪，心情與Mango一樣大靚，他說：「做慈善心情係開心啲！」當追問何時計劃結婚，城城笑言未是時候。玩即興？他笑道：「即興？煮飯咩！（天王只欠他未婚？）我同工作結婚，但都支持同祝福佢哋幸福快樂。」
文：音樂組 攝：黎志輝