o靚模Lavina與Rainbow昨日穿tube top配熱褲在銅鑼灣鬧市宣傳全新輕薄版PS3，二人還刻意烏低身做出起跑姿勢，Lavina「胸」湧澎湃搶去Rainbow風頭，吸引一眾龍友駐足圍觀與拍照，二人更沿途讓途人任摸手上的電玩遊戲機，但全程冇人吼兼彈開，連外籍男士亦不例外，場面尷尬得十分搞笑。
兩人接受訪問時坦言已做足安全措施，不擔心走光，至於會否擔心被人錯手摸胸？Lavina坦言大會已加強保安：「唔會，除有猛男工作人員保護外，仲有一班fans到場睇實！」
唔吼有錢仔
有傳Kama認識富家子後，有意退出娛樂圈，Lavina坦言人各有志：「只要佢生活得開心，我好支持！（你係咪好開心少咗個勁敵？）唔會，我若然擔心被人搶工作，不如用實力去證明自己生存價值仲有意義！」至於會否羨慕Kama？Rainbow表示已經報讀夜校，重讀中五，沒有時間拍拖。
Juno晒肌肉
此外，麥浚龍（Juno）以七位數字酬勞擔任PS3最新遊戲機代言人，在廣告大晒0%脂肪完美肌肉。由於酒井法子早前涉吸毒案，廣告商擔心藝人言行影響商品形象，事前明查暗訪Juno身家清白才簽約合作，更開門見山要求他切勿行差踏錯。
文：名人組