2R昨日出席電腦節活動，妹妹Race突然指住家姐說：「家姐有大事宣布。」Rosanne即說：「係呀，我結婚。」並透露未婚夫是中英混血兒牙醫：「佢姓白，依家佢仲喺英國，因為有診所喺嗰邊。」問到與未婚夫拍了多少年拖？她不願透露，只說：「相識八年嘅好好朋友，佢身高有185cm。」更大讚未婚夫勤力、人品好及有正義感。」Race則說：「佢好靚仔。」

感動落淚

Rosanne憶述求婚過程說：「兩星期前我哋成家同埋佢一齊去法國度假，喺間餐廳度，成家人走晒出門口，男友突然攞出戒指跪低求婚，我即刻喊，好驚，未試過，佢第一句就話想同我一生一世，我就答佢Yes I Do！」Rosanne坦言未婚夫早已知會其家人：「佢哋夾埋，成家人企喺門口『裝』我，妹妹仲偷拍Video，其實佢好早就問晒我屋企人，個個都話ＯＫ。」

退出娛圈

問到閃電結婚是否有了ＢＢ？她說：「唔係，我都希望有。（生幾個？）最好打孖生兩個。」並表示婚後會不設防：「有咗ＢＢ都想做全職媽咪。」問到婚禮日期？Rosanne說：「搵咗地點再定日子，不過一定喺教堂行禮，應該年底喺香港同新加坡擺酒，兩位妹妹做伴娘。」至於婚後會否退出娛圈？Rosanne說：「近年比較少做幕前，嚟緊同妹妹出一隻教小朋友國語嘅ＤＶＤ。」此外，記者在網上發現多張Rosanne去年及前年與外籍男士旅行的照片，未知其中一位是否其未婚夫。

採訪：音樂組