周秀娜前晚與趙碩之（Wylie）狹路相逢，之前喪插周秀娜寫真教壞人的Wylie，前晚竟谷胸示人搶晒鏡，盛傳因多口四處惹火頭而要被雪藏的她，透過傳媒表示想向周秀娜Say Hi，又謂要向對方學談吐，前後變化之大，令周秀娜也被嚇窒。
周秀娜、Wylie、陳偉霆跟周柏豪等前晚齊集九龍城某酒樓，為邱禮濤執導的新片《死神傻了》開工。「死敵」周秀娜與Wylie雖應傳媒要求合照，但全程面左左，擺明互相唔妥。
見面唔尷尬
周秀娜與Wylie合照時窒步，她笑笑口解釋說：「我成日都重心唔穩㗎啦，（佢衰多口被雪藏？）係咩？唔知呀，佢發表個人意見啫，（私底下冇偈傾？）見面都唔尷尬嘅，但我同佢都冇對手戲。（佢話完你sexy，自己又谷胸？）戲服係劇情需要。（佢話要慎言，要跟你學談吐，又想同你傾偈。）我都係學習中，冇資格教人，雖然我唔識講嘢，但樂意做聆聽者。」
被嘲懵盛盛
盛傳被雪的Wylie說：「我問公司，答案模棱兩可，但我冇聽林生（林建名）親口咁講，我希望學識慎言，經理人話我要時間冷靜吓，暫時嘅工作就係學嘢，咁啱我之前報咗好多course充實自己。我講嘢亂七八糟，好想學周秀娜談吐。（會否向周秀娜、Yumi道歉？）成件事係誤會、誇大，（Yumi被你攻擊到想自殺喎！）應該唔係，你唔信我，都信Yumi為人，佢切菜切親啫。」
另外，戴夢夢昨日偕師妹Melody出席奧海城的台灣賑災活動。對於Wylie及Yumi遭公司「雪藏」，戴夢夢說已和兩人聯絡，自言跟Wylie較熟的她指覺得對方經常「懵吓懵吓」，提議對方趁休息的時間進修語言課程。
文：影視組