黎明昨日在中環鬧市左穿右插，於馬路中心喪跑罔顧安全，簡直搵命博！尾隨的葉璇氣咳之餘亦大汗疊細汗，「濕透」的她將玲瓏浮凸身材表露無遺。
昨日中環街頭星光熠熠，除鈴木仁及Angela孖公仔現身、馮德倫急步上周星馳公司外，黎明（Leon）及葉璇（Michelle）亦在雲咸街，拍攝林超賢新片《火龍》。
突然落雨
劇情交代扮演警員的Leon及Michelle捉賊喪跑，雖然替身在場候命，但Leon毫不錫身親自上陣，導演一聲令下，他即在「長命斜」上的車輛堆中左穿右插，險象環生，途人見黎天王失驚無神擦身而過，還以為自己眼花！
雖然Leon相當落力，可惜天公不作美，途中突然下起大雨，一度影響拍攝進度。雨勢稍停，林超賢即把握時機要Leon等人再跑數次，來來回回之下，眾人滿頭大汗，便裝雜差打扮的Michelle亦全身濕透，更禁不住邊行邊脫掉外套，僅餘白色汗衣，玲瓏身材迅即凸現，相當養眼！
被指阻街
據悉，《火》片昨早開工時，警方接獲投訴電話，指劇組阻塞附近行人通道。Leon經理人對此回應：「Leon今日要周圍跑，一直戴住耳機同導演保持聯絡，所以唔知呢件事。」而導演林超賢則謂：「當時係有警員嚟過了解情形，不過見到冇事就走咗啦。」
另外，鈴木仁與Angela發現有記者即彈開，但未夠幾步又再次依偎，愛得癡纏。而馮德倫發現《火》片劇組開工，上樓後又專程落樓與相熟工作人員寒暄。 文﹕影視組