楊秀惠、陳美詩、黃長興與陳智燊昨日出席明珠台《一拍成名》之「拍出個未來」活動，期間孫耀威的新歡舊愛陳美詩與楊秀惠，難得同場卻絕無避忌，二人更應記者要求大方搭膊合照，當中現任「威嫂」陳美詩，以一襲低胸裙示人，拋胸上陣撼贏過氣「威嫂」，突圍而出，勁搶風頭。

孫耀威	陳美詩低胸上陣，黃長興都要攞番個好角度影幅沙龍。	楊秀惠與陳智燊當眾玩自拍。

讚老孫好男仔

事後，陳美詩被追問到與孫威耀戀情時，她未有正面回應，只否認與對方同居，而言談間又大讚孫耀威人品好，莫非她默認戀情？陳美詩說：「唔知點解有咁嘅新聞，嗰日係群體活動查經班，唔知點解話我哋同居。（孫耀威追你？）唔係咁講，佢係好男仔。（佢有冇約你？）佢係好男仔。（佢好花心㗎喎！）報道咁寫啫，未必係事實。（同佢有冇發展機會？）睇上天有咩安排。（對佢有冇好感？）好多人覺得佢好人，好多女仔對好嘅人都有好感，我都係正常女仔，總之我澄清絕冇同居。（咁你會唔會澄清拍拖？）呢方面好低調，唔回應。（今日係咪專登低胸打扮撼情敵？）唔係咩情敵，大家係同事，件衫係贊助。」

過去式唔尷尬

至於過氣「威嫂」楊秀惠則表示，與陳美詩碰面絕無尷尬，她說：「我哋緋聞係過去式，應該佢尷尬啲，我都想知佢哋緋聞係咪真。（報道話你上次喊，係見到孫耀威攬陳美詩？）吓，佢有冇去我都唔知。（會唔會教陳美詩點防男人花心？）男人要控制花心好難，所以依家唔諗拍拖住，專心工作。（今日唔夠性感被搶風頭？）平時我都肯露㗎，但係都要畀佢休息吓。」

文：影視組