《2009香港小姐競選》將於本月廿二日舉行決賽，由於去年港姐張舒雅經常攞病假，辣㷫無綫，所以被取消加冕資格，雖然她早前曾主動聯絡無綫，希望做回港姐工作，但最終都不得要領，無綫堅決要叮走這位Hea爆港姐，至於究竟今年由誰加冕，一直都是個謎，而昨日這個謎底終於解開，今年將由朱玲玲以慧妍雅集永遠榮譽會長身份，為港姐冠軍加冕，這位「港姐中的港姐」可說極具資格，至於張舒雅就連決賽當晚都不用出席，可以繼續「休息」！

除了加冕人選已定，一班港姐亦為參賽作最後準備，昨日十位候選佳麗到旺角首飾贊助商試戴首飾，並即場投票互選出「最佳首飾演繹佳麗」。佩戴上名貴鑽飾的佳麗們以Catwalk形式先後出場，(9)袁嘉敏行Catwalk的動作最大，雖然出位，但顯得「浮誇」，最後獎項落在(7)鍾溥敏手上，獲贈首飾獎勵。

張舒雅被叮走冇得亮相。 （資料圖片）

十位佳麗獲贊助首飾，昨前往試戴。

(7)鍾溥敏首次奪獎

(7)鍾溥敏對奪獎，自言勝在擺甫士有花心思，問到她今次攞獎是否靠友情牌？她說：「參加以嚟今次係第一次攞獎，希望努力唔會白費，其實一班佳麗個個都好Friend，相處得好好。」

甫士誇張的(9)袁嘉敏就說：「因為見其他佳麗好女性化，自己就希望行得Rock啲。（冇獎攞失望？）唔會，參賽以嚟都未攞過獎，都有心理準備決賽都會冇獎攞，到時如果贏就當Bonus囉，所以冇乜壓力。」

(2)林潔瑜未受打擊

被封為「女版許願」的(2)林潔瑜被網友捧為「大熱」 ，她說：「睇到報道感到好意外，但係會當係正面去睇！呢兩個月都變得好Tough，呢啲嘢打擊唔到我！ 」

文：影視組