前文已略述元華的斑斑劣迹，他的百厭史實在長得罄竹難書，十日十夜也數不完，食煙、放火、跳樓、攻擊同學等無惡不作，比起成龍及三毛，元華三日一小鬧，五日一大鬧，冠絕同儕，登上藤條榜之王，是于占元師傅藤條下的「大師兄」。

百厭煲蠟‧險釀火災

談起昔日百厭史，元華笑笑道：「我哋除咗練功外，平時都有少少娛樂嘅，咪拍吓公仔紙、拋吓仙囉，有一次奀皮玩火煲蠟，總之所有易燃物品都加晒入去，最後一加水，『蓬』一聲就起火，差啲燒晒成個儲物室。師傅知道後火都嚟埋，即刻攞住把刀話要斬我手指，佢二話不說就捉住我隻手，佢做好晒動作，等我有個準備，就手起刀落要斬落嚟，我即時縮手，師傅就斬唔到我，然後佢就推開我，當罰咗我就算。」

雖然差點被斬手指，可是合約列明打死無怨，就算真的被斬手指，元華又怨得了誰？可是元華百折不撓，依然故我，因此在師兄弟中，他素有「小花臉」和「小丑」之名。

其實有哪個孩子不百厭？可是元華應學不學，學人食煙，一食至今，總是戒不掉，元華說：「嗰時飯可以唔食，但煙仔一定要食，當時我見師兄弟食，自己就食埋一份，臨離開學校，師傅發現我偷煙仔，我心諗你都唔係鬧得我幾耐，你咪鬧囉，我照食。」

除了食煙外，打架對元華而言也是家常便飯，無論內訌還是向外，拳頭就是元華的身份象徵，當日為爭衫架，他出熨斗擋格元秋拳頭，令元秋手臂永留疤痕，足見元華打架是不問事情大小，不分男女老幼。元華說：「唔止七小福，我哋都好鍾意同出面人打交，梗係啦，出面啲人成日話我哋光頭仔，唔火滾就有鬼，我哋成日打到上差館，啲警察我哋都熟晒。」

捱打紀錄‧代罪羔羊

元華愛撩事鬥非，受罰是理所當然的，可是他捱打七十多藤的紀錄，卻不是因百厭，而是衰義氣。當年三毛離校出走，元華知情不報，慘成于師傅極刑下第一犧牲者，反觀三毛則拍拍屁股逍遙藤外，本來應有此報的元華，這次卻成了代罪羔羊，上天似在拿他開玩笑。

（四十五）