泳兒昨日為入行以來第六張大碟《多一點》舉行發布會，近百歌迷到場支持，更有五十名帶住印有泳兒肖像頭的歌迷在鬧市造勢，場面墟冚。由於天氣非常酷熱，泳兒特別印製愛心紙扇派發畀現場市民，大受歡迎，雖然早前鄭融在活動上被非禮，但勇字當頭的泳兒仍照樣走入人群，問到她有否小心護胸？她竟說：「哎呀，我唔記得咗！因為大家啲手伸晒過嚟，我就不停派囉，我警覺性都算好低！」

獲頒金唱片

大會宣布泳兒的新碟推出不足兩星期，但就已經達到金唱片銷量，認真可喜可賀，英皇行政總裁吳雨及IFPI代表特別到場向泳兒頒發金唱片，吳雨更笑稱如果新碟賣到白金數字，就以熱褲示人，泳兒說：「嘩，咁大犧牲？咁我試吓着一件頭泳衣啦，或者熱褲加小背心囉，同吳雨大哥一齊晒長腿。」

吳雨（右）與IFPI代表向泳兒頒發金唱片。

現場有五十名戴上泳兒肖像頭的粉絲造勢。

唔只賣靚聲

泳兒坦言今次落足心機做碟，特別花時間去參考其他歌手的唱功，她又說：「好想畀人知道泳兒唔只淨係賣靚聲，歌曲都可以感動人。」

文：音樂組