農夫及艾粒前晚以西裝look出席最後一場「拉闊音樂擂台」，吸引Donald女友張詠恩、鄧穎芝、張繼聰、Mr.成員MJ及Dash捧場，音樂會開場不久歌迷已站起，少爺占即主動示意歌迷到台前：「出嚟啦！」全場歌迷聽罷一擁而上，將大會攝影師重重包圍，連保安亦被圍住，結果要少爺占開腔要求歌迷退後五步，才避免在鏡頭前「失蹤」。

赫見翻版軟硬

期間，多位性感女舞蹈員與四子大跳辣身舞，更為四子用絲帶蒙眼及借位「咀嘴」，引得全場歌迷嘩鬼叫。由於日前陳偉霆開騷時獲緋聞女友Angelababy捧場，少爺占笑說：「今日我個baby都嚟咗，大家去搵吓佢啦！」四子又化身多個組合獻唱金曲，少爺占更被歌迷感動得衝到台邊玩「插水」，可惜無功而回，最後，RubberBand成員泥鯭夥拍樂隊蘇C虎成員阿豪打扮成翻版軟硬出場，相當抵死。

（左起）二人一組的艾粒、翻版軟硬跟農夫同台鬼馬合照。

少爺占嘗試玩「插水」失敗。

報大數冇呷醋

事後，C君大方表示女友有捧場，問他與女舞蹈員跳辣身舞是否已跟女友備案？他笑說：「我講大咗會有錫錫，所以唔驚。」另外，野仔、Zarahn、Mr.及Dear Jane將於本月廿七日舉行一場音樂會，昨日眾人表示有意效法周秀娜推出人形公仔，周國賢笑說：「要吹氣嘅，可以帶去旅行。」

文：音樂組