飲食生意‧勁蝕收場

元秋慨嘆當年發展未如理想，令她無心戀戰，她說：「嗰時喺學校出嚟，有間公司簽咗我同成龍，但我拍咗兩部戲啲成績都唔係好得，令我開始有啲心灰意冷，想話不如就咁收山唔做啦，直至有一次去咗韓國拍戲，打長途電話返屋企同個仔傾偈，聽到個仔喺電話度係咁喊，不斷嗌：『媽咪！媽咪！』個心真係乸住乸住，聽到我都忍唔住喊，思前想後，最後都係唔捨得個仔，於是決定疊埋心水收山，返屋企湊仔！」

對女人來說，家庭才是她們的畢生事業，即使戲台上反串武生、虎虎生威的元秋也不例外，不過武生又豈能安坐於室？元秋說：「冇戲拍，冇嘢搞，就搵啲生意仔搞吓，學人搞飲食生意，嘩，真係蝕到阿媽都唔認得呀！之後又搞酒吧，不過主要係招呼熟朋友。」

商場上講究長袖善舞，但元秋此「武」卻不同彼「舞」，始終命中注定吃戲行飯的人，兜兜轉轉還是會重回舊地。元秋說：「嗰年周星馳套《功夫》試鏡，我陪元菊、元輝佢哋上去，幫佢哋壯膽，周星馳叫元菊試啲表情畀佢睇，我就匿埋喺後面歎報紙，突然間星爺話：『後面食緊煙、歎緊報紙嗰個，同我行出嚟』，我都唔知佢點解叫我，或者貪我食煙個樣夠衰啩！」

無心插柳‧星爺睇中

雖然獲出名要求高的周星馳選中，但元秋未有即時答應，直至周星馳開出萬事有商量的條件，以及保證《功夫》幕後班底有七小福成員參與，元秋才首肯答應參演，她說：「我成廿年冇拍戲，仲要增肥廿四磅，日日係咁飲奶谷肥自己，加上冇劇本，戲名又改嚟改去，有啲唔慣，另一樣同我以前拍戲唔同嘅，係依家有得睇playback，係呢樣唯一好過以前。」

（四十）