本文重點
前日為Lucas兩歲生日，但張栢芝跟謝霆鋒竟丟低寶貝仔一同出埠旅行，惟有由錫孫錫到燶的拉姑帶孫仔到中環購物賀牛一。Shopping期間Lucas拿着店內小擺設不肯放手，還跟嫲嫲玩追逐戰，搞到拉姑一仆一碌。
霆鋒最近長期留在內地拍攝新戲《十月圍城》，留港時間少之又少。近日霆鋒難得有幾日假期，即趁機和栢芝外出旅行過二人世界，就算寶貝仔Lucas兩歲生日也未能趕及慶祝。栢芝經理人周小姐透露：「霆鋒難得呢幾日放假，唔係就有排都冇假放，所以佢哋咪趁呢日去玩，返嚟先同個仔補祝。」雖然父母不在身旁，但壽星仔Lucas仍有嫲嫲拉姑為他賀牛一。
見慣大場面
前日約六時，一身豹紋Look的拉姑與鬍鬚Kong先帶Lucas到中環購物，期間Lucas拿着一個車仔擺設喪玩唔肯放手，拉姑追住Lucas拿回擺設不果，更險些仆親。記者上前問到栢芝與霆鋒會否返港陪囝囝過生日？拉姑表示：「佢哋趕唔切返嚟，今晚我同爺爺（四哥）會先同Lucas慶祝。」
跟孫仔Shopping後，拉姑等人乘七人車前往灣仔福臨門食飯，而謝賢（四哥）亦由上海趕回來為孫仔慶生，Lucas姑姐謝婷婷則獨自乘的士到場。眾人於晚上九時半一同步出，見慣大場面的Lucas看見門外有記者拍照，即時眼仔碌碌，十分可愛。問拉姑送了甚麼禮物給孫仔？她說：「一個好大嘅蛋糕。」而昨日栢芝家姐戴碧芝就帶Lucas外出玩耍，其後跟Lucas及女兒一同回到栢芝位於赤柱的寓所，弟弟栢文與女友亦前後腳到栢芝家。
文、攝：追蹤組