談到如何將師承自于占元的京劇發揚光大，成龍語帶無奈說：「以前京劇受歡迎，係因為當時啲人冇乜娛樂，依家有咁多消遣，仲邊有人睇京劇？京劇唱一句『你好嗎』，可以唱足十五分鐘，由後台行到前台，可以行成半個鐘，依家啲人仲有冇心機睇你？」

時代變遷‧扼殺國粹

不是成龍向京劇潑冷水，而是京劇落在香港這片文化沙漠，凸顯出它的曲高和寡。曾倡導創立香港京劇研習社的包幼蝶指出，京劇在香港發展面對兩難處境：「京劇，唱得不好，就沒味兒，聽就是聽那種味道，台上一拉腔就是老半天。一個音唱足三分鐘，外行人不曉得，要抓破頭皮啦！」

在講求速食的今天，講京劇發展抱負似乎太奢侈，成龍說：「坦白講，抱負真係冇乜，時代變，京劇喺香港冇人睇，喺內地都只係得四、五十歲上咗年紀嘅先會睇，後生嗰輩唔會有興趣學京劇，太辛苦啦！學完出嚟仲要冇出路，我覺得京劇唔可以唔變，唔可以幾十年嚟都係咁樣。」

成龍引述一次親身經歷，指出京劇要發展，就必需要變，他說：「京劇功底對拍動作戲有幫助，但都要睇情況，十年前我拍《贖金之王》，搵咗隊上海武術隊去美國拍戲，佢哋喺零下幾度捱凍扮印第安人，係好專業，但係啲做手同關目仍然係戲台上嗰種，冇印第安人望人係好似演戲大老倌咁眼厲厲㗎！所以話唔可以攞住京劇嗰套，照辦煮碗塞入電影度。」

培育人才‧開枝散葉

成龍更以自己為例，自豪地說：「好似我咁，滿師之後走去學西洋拳、合氣道、跆拳道、空手道、詠春，話時話，我有啲慶幸當年學校唔係正宗嘅戲劇學校，等我可以北派又學、南派又學，甚至連英文都學埋，呢啲基礎對我哋日後發展好有幫助。如果問我想唔想開學校，我敢講個個跟過于占元嘅，都會想，但咁多年嚟，成家班、洪家班一樣有培育人才，你睇依家影圈，好多人都係我哋訓練出嚟！」 （三十九）