舒淇與郭富城闊別十年再結片緣，昨日於數碼港開工，在33度酷熱天氣下拖手於街頭喪跑，二人未埋位已汗流浹背，不過論辛苦程度還不及Square成員Brian及James，因二人與飾演武師的臨記打鬥，結果被弄至瘀傷連連。
兩位影帝后人馬昨日為新片《全城戒備》開工，飾演記者的舒淇，獲擁有特異功能的城城協助採訪，途中被行家發現惹來反追訪，舒淇雖然以背心look上陣，但仍難抵猛烈太陽，故未埋位前已把頭髮束起，又頻頻以紙巾抹汗兼補妝，而城城則把外套脫去，出動小風扇抖涼，起初導演只拍攝兩人埋伏於草叢採訪戲份，故舒淇與城城輕鬆完成，及後他倆移師街頭拖手「逃亡」，不過兩、三take過後，兩位主角幾乎被高溫融化，導演陳木勝見狀亦體恤他們快快收貨。
火花更勝從前
正忙於為台灣個唱作綵排的城城，透露近排既要拍戲又要排舞，令其清減不少，談到與舒淇再度合作，城城指10年前兩人於《風雲》對手戲不多，相反今次卻由頭帶到尾，故默契及火花更勝從前，問到二人有否親熱戲，城城則大賣關子，更謂：「有冇唔係重要，最緊要娛樂性高，呢套戲我有幾個造型，當中肥仔look我每次整都皮膚敏感，要睇醫生同食藥，好在呢啲戲份已經拍晒。」而片約不斷的他，將於９月份拍攝彭順執導的《Ｂ+偵探》。
打到周身瘀傷
而Brian及James則飾演舒淇助手，兩人為助她逃脫而與行家發生衝突，電影公司為求逼真，竟找來武師與他們對打，結果二人被打至飛起，直至導演喊停機仍繼續演戲，認真投入，對此Brian謂：「既然係打就投入啲，我腳同頸都瘀傷晒㗎！早知就墊pad啦！（同舒淇合作點？）佢冇架子，好值得我哋學習。」
文：影視組