林海峰（Jan）於九月將紅館變婚禮場地搞「是但噏我願意」，昨日在記者會上，阿Jan以「長鼻子」造型作出「我願意」四大承諾，包括「賣晒飛就冇嘉賓」、「歌手捧場他願意讓出舞台」、「為G模設簽名板」及「與觀眾同甘共苦兩小時」。
講到整鼻一事，阿Jan則模仿藝人整容口脗：「冇，我否認，我冇整過個鼻。」記者指時下熱話是整容和G模，阿Jan抵死說：「咁一場講G模，一場講整容，（仲有陳柏宇《你扯我扯》？）嘩……呢個講兩場，你扯一場，我扯一場！」阿Jan更玩埋食字：「但大家唔好扯（走），扯咗冇人睇！」阿Jan解釋talkshow不是講結婚，是借出場地給各位準新人在紅館行禮，並提議愈早結婚愈好，遇到不好都夠時間搵過第二個。