MJ父親祖前日接受美國廣播公司訪問，他指兒子的死應與謀殺有關，更指對MJ濫藥一事毫不知情，只知藥物能助他放鬆及休息，他說：「啲藥應該幫佢放鬆，但佢就一睡不起，我唔敢相信喺MJ身上發生嘅事。」

黛比冇換過尿片

他又稱三個孫應該由他與太太嘉芙蓮湊大，並表示：「我一直觀察住巴莉絲，知道佢想入行，王子米高二世就跳舞好叻。」直言有意捧孫兒入行作搖錢樹，難怪有指MJ生前曾向朋友表示不想父親照顧三個仔女。

MJ前妻黛比日前接受雜誌訪問，透露三個細路都不會叫她做母親：「因為係人工受孕，我只係賺咗母親呢個名，所以我唔想佢哋叫我做媽咪。我冇試過同佢哋換尿片或者半夜起身照顧佢哋，全部係MJ做晒。」黛比曾為MJ其中一名醫生Arnold Klein當護士，Arnold被懷疑曾過量開處方藥給MJ，故黛比亦成為被調查對象之一，恐怕會影響她爭撫養權。而應黛比及嘉芙蓮要求，MJ兒女的撫養權官司現押後至本月廿日開庭，律師聲明中更有庭外和解之意。

家鄉舉行追悼會

另外，MJ家鄉印第安納州加里市前日於一個棒球場舉行追悼會，吸引六千名fans出席，有人漏夜排隊，希望能入場送別偶像，遲到兩小時的祖及其餘三十多名家屬亦有到場。現場有七呎高、刻有MJ招牌舞步的大理石板，亦有大班小朋友扮MJ載歌載舞。

文：外娛組