Tasya甫開始接受訪問便興奮提到八月及九月將兩度到訪亞洲，期間會到香港作宣傳。Escala首張大碟於英國甫推出便躋身流行大碟榜亞軍，Tasya表示始料不及，由於四女風格與「古典辣妹」組合Bond相近，難免被人作比較，她回應：「我哋好鍾意Bond㗎！佢哋好可人，未有Escala之前，佢哋係唯一嘅弦樂四人組，其實我哋喺編曲、表演或者做音樂嘅方法同Bond唔同。我哋好想樂壇多啲弦樂組合，唔好只係歌唱組合，畀大家多種選擇，健康啲。」

替《全英一叮》解畫

出身於《全英一叮》真人騷比賽的Escala，提到早前天籟村姑Susan Boyle因比賽大熱倒灶而一度入院，Tasya指：「唔可以話單位處理得唔好，冇人知佢會有咁大回響，連Paul Potts都冇咁犀利，可能Susan亦未準備好點承受呢啲壓力，傳媒亦要負責任。不過，好彩我哋有四個人，所以入決賽時可互相勉勵。」她更維護老闆兼《全》節目評判Simon Cowell，指節目未有不照顧參加者的意思，反而令平凡人有機會一舉成名天下知。

提到流行天王米高積遜（MJ）的離世，Tasya表示曾考慮揀兩首MJ的歌演奏，但最後也未有而覺得好可惜。

文：外娛組