在新劇飾演妓女的姚子羚，日前拍攝一場被殺後遭埋屍鹽堆的戲份，而拍攝時姚子羚被鹽焗足四小時，成為正宗「鹽焗雞」。
姚子羚與高鈞賢在無綫新劇《蒲松齡》中飾演另類情侶，劇中飾演女鬼的姚子羚，與靚仔書生高鈞賢展開一段人鬼情未了，日前姚子羚就要拍攝一場被殺後屍體被埋於鹽堆中的戲份，而拍攝期間，雖然她已做足防鹽措施，由頭包到落腳，不過依然失守，更不慎被鹽入眼，認真痛苦。
順道美容
姚子羚表示：「其實拍之前工作人員為我包好保鮮紙，費事我畀鹽乸親，不過劇情講我被人埋屍，兇手仲將啲鹽撒向我塊面，所以唔小心有鹽入眼好乸，要工作人員即刻攞啲水畀我沖走啲鹽。雖然咁辛苦，不過就有工作人員笑我係『鹽焗雞』，因為我喺戲裏頭，生前係一名妓女，而死後就被人用鹽埋屍，名副其實嘅『鹽焗雞』。（係咪拍得最辛苦嘅一次？）唔係，畀鹽焗當美容磨沙，記得最辛苦係拍《棟篤神探》，講我畀人追打，黎諾懿嚟救我，一下就跳上電單車度，點知拍嘅時候我跳唔到，仲跌咗好多次落地。」
挑戰喊戲
而高鈞賢就話今次已經係第三次拍古裝，由於今次要同姚子羚上演人鬼情未了，所以戲裏他有不少喊的鏡頭，對他來說挑戰甚大，他說：「好少拍喊戲，所以每次埋位要喊，我即刻諗住我最愛嗰隻狗，如果死咗嘅話我一定會好傷心。」
文：影視組