向來嗜杯中物的曹格，屢次被誤傳醉酒出事，日前他接受本報獨家專訪時詳述受傷經過：「嗰晚太太為我準備咗Surprise Party，我去到的時候大家都飲緊香檳，我媽咪都在場，大家玩得好開心，一齊乾杯，碰完杯之後我就見到自己隻手流血。本來以為係好細個傷口，我同太太講要去醫院，佢仲留喺現場同朋友玩，係公司同事陪我去，大家諗住15分鐘搞掂就走得。」
唔鍾意Clubbing
曹格到醫才知道傷口很深，要在病房等醫生縫針：「我係等到瞓咗覺，第二日出院的時候個人都未醒得晒，返到去先諗起我做咩摸住個頭畀記者影？我真係好冤枉呀，所以夜晚即刻影張相放上Blog，等歌迷、朋友唔好擔心我！」
面對負面新聞，曹格認為最重要是問心無愧：「我本來唔想澄清，只想喺Blog度寫畀歌迷睇，信就信唔信就唔信，總之我冇做過，喺機場見到咁多記者仲以為梁朝偉嚟咗，好驚喜有咁多傳媒關心我！我知傳到我縫咗三十幾針，三十幾針有隻手咁長啦，放心，我只係縫咗六針。」說罷即用手向記者比劃六針與三十多針的分別，他續說：「太太都冇話我，平時實會鬧！」
曹格表示昨日已為右手手指尾的傷口拆線，但要完全康復需要一年時間：「最主要會影響到彈琴，手指尾對彈琴好緊要！」曹格直言不會因此事戒酒，他視酒為與朋友的交流：「以前會飲到好醉，依家唔會，酒精同件事冇關，我覺得唔係要小心點飲，係要小心喺邊度飲，而且我真係唔鍾意Clubbing呀！」
想兒子有愛心
喜歡有話直說的曹格，曾表示最擔心被囝囝曹三豐誤會是酒鬼：「我未入行前係打過交，但係畀個機會啦，我想做個好榜樣畀阿仔睇！我想佢做個非常有愛心的人，唔係要成佛升仙，但係要做個好人、有愛心、做個負責任、肯承擔的男人！」曹格赴傷仍然四圍飛出席活動，以身作則做個有承擔的男人！
即將來港舉行bma為其製作個唱的曹格，自爆最想拍港產片：「其實我鍾意睇電影多過聽歌，好多香港導演我都好鍾意，最想同陳可辛合作！」曹格又大讚同樣Man爆的謝霆鋒在電影《証人》表現出色，他笑言：「成日傳我被人打，其實我都好打得呀！」
文、攝：盧坤穎