在于占元師傅嚴厲的訓練下，中國戲劇學院學員個個身手了得，毅力驚人，不過，奧運金牌選手也有失手之時，何況是七小福這班小豆丁。在他們演出期間，蝦碌甩漏時有出現，卻意外成為觀眾喜愛的餘興節目，就像後來成龍電影將蝦碌鏡頭放在片尾一樣，這是笑口棗，一粒落肚令人會心微笑。

掛褲出場‧蝦碌爆笑

七小福在荔園的第六劇場表演了最少七年，要他們演出完美無瑕，未免吹毛求疵。儘管于師傅不容許七小福有任何錯漏，可是在荔園的表演舞台，地細人多，縱使擁有成龍這般身手，也無法保證沒出錯。

憶起當年的趣事，成龍至今依然歷歷在目：「有次我做包公掛鬚，喺後台準備嘅時候，我將把假鬚放喺腰帶度，到出場時又順手攞多把鬚擺喺面上，一行出台就邊講第一句對白『老父』，隻手就順住把鬚一路掃，嗰次我隻手仲掃到落地下，不過因為我做包公着住黑衫黑褲，大家睇唔到我戴兩把鬚，以為我把鬚真係長到落地下。」

不過要數令觀眾笑破肚皮，就不能不說這場「連旗帶褲」的場面，成龍莞爾說：「嗰陣大家都會將衫褲掛喺後台幅牆上面。有次我個造型背脊插住四支旗，一行出台觀眾就係咁笑，原來係我行出台時支旗鈎到條牛仔褲，結果我就掛住咗條牛仔褲出台，幾瘀呀！」

其實不管七小福身手如何矯健，不過要靠未成熟的腦袋，把眾多劇目的對白囫圇吞棗，也太強人所難，所以他們發台瘟也非罕見，只靠臨場執生。

角色兜亂‧腦袋空白

元秋說：「我哋每晚都要做唔同角色，個個扮相同對白都唔同，有時都會搞到亂晒，一出台腦裏就一片空白。有次同三毛同台，佢有段獨白，但係佢唔記得台詞，接唔到我嗰句，佢竟然爆肚咁講『你猜』，當時我都唔知點應佢好，就回咗佢一句『去你媽的』。」

三毛、成龍、元彪等七小福有今天的成就，絕非唾手可得，能在三秒內讓觀眾說出他們的名字，又豈是朝夕之功？（廿四）