從簽下契約開始，師徒之間即結下不解之緣，既然打死無怨，又豈容小子偷懶？不過一天十六小時練功這等大折磨，不偷雞躲懶實在愧對自己。

天台捉懶‧雞飛狗走

元秋雖是師傅眼中的天才，每項訓練一點即通，別人練五句鐘，她只消五分鐘便做到，但聰明總被聰明誤，劣根性也從此而起。

對於偷懶二三事，元秋和元甫憶述道：「最記得嗰時喺天台跑圓場，除咗練步法之外，亦要練造手，隻手成日要槓起真係好攰㗎，所以每次以為師傅唔在意嘅時候，我哋就會放隻手落嚟係咁意跑吓就算，點知有次師傅真係見到我哋偷懶，於是就一邊攞藤條係咁打我哋，一邊就大罵『看你還懶不懶』，搞到我哋嚇到係咁走，好似賽跑咁，個個都雞飛狗走。」

元秋因天資聰敏而練精學懶，但一山還有一山高，元華堪稱「偷懶鼻祖」，多次逃過師傅法眼。元華說：「練功時，我哋成日諗計hea，當年眾師兄弟齊集天台練功，無論師傅離我哋有幾遠，只要自己唔喺佢視線範圍，就會想盡辦法偷懶。有時師傅會落樓下抖吓，雖然我哋明知師傅會喺樓下豎起隻耳仔聽吓我哋搞緊乜，但我哋都好醒嘅，咪扮晒嘢揼地扮練功囉，等師傅有啲聲聽吓，以為我哋練緊功。」

雖說元秋天分高，不過偷懶技巧卻未算純熟，下場是「偷雞唔到蝕把米」，相反元華深諳側側膊之道，「偷完雞照做保長」，可見偷懶也是一種學問呢。

當場斷正‧雙倍奉還

元華雖偶爾瞞天過海，馬虎過骨，不過沒有人得到永遠的着數，總有避無可避的窘境。無論元秋、元華，甚至是成龍，也吃過倒豎樁的苦，小朋友手力較弱，每天起床便要用臂力支撐全身，每位學員都做到叫苦連天，趁師傅看不到時停下休息，可是于師傅似乎身懷「測懶機」，總會突然出現令偷懶者斷正。被逮個正着的七小福，藤條服侍是少不免的，更慘就是要「雙倍奉還」，練功練多兩次，足見于師傅教學方針，是「以勤治徒」。

（廿一）