楊怡、馬浚偉、黃浩然、張美妮、馬蹄露、惠英紅，昨日齊齊出席無綫劇集《碧血鹽梟》宣傳活動，大玩食雪糕糯米糍及嘴對嘴傳心形膠片遊戲，期間眾演員齊齊整蠱監製李添勝，拉埋對方一同玩遊戲，首先安排楊怡打頭陣，與監製面對面鬥快同食一個糯米糍，其後又安排劇中所有女演員向監製「獻吻」，搞到監製十分尷尬，更合起雙眼硬晒軚，場面搞笑。

劇中女演員齊齊向監製李添勝「獻吻」，嚇到添哥硬晒軚。	楊怡打頭陣整蠱監製，並與監製鬥食糯米糍。	馬浚偉（左）、黃浩然將心形膠片咀落楊怡塊面度，搞到佢滿面口水。

否認整蠱監製

事後，楊怡否認嚇到監製硬晒軚，她笑說：「估唔到添哥（李添勝）夠膽行出嚟一齊玩，我哋唔係整蠱佢，我見佢不知幾開心呀，笑到見牙唔見眼。（佢畀你哋嚇到硬晒軚？）佢唔係硬晒軚，全部錫佢嘅都係美女嚟。」而馬浚偉自言剛由加拿大返，所以感覺仍然有時差，他謂：「我哋整蠱監製？都唔知點解變咗咁，不過添哥好玩得。（咁玩佢驚唔驚唔畀劇你哋拍？）唔驚，佢好玩得。」

成世人未試過

監製對於被眾演員整蠱一事，他大方謂：「都係玩吓啫。（尷唔尷尬呀？）梗係尷尬，成世人都未試過畀咁多女仔錫。（係咪好有艷福？）成世都未試過。（開唔開心？）開心。」此外，同場主持人張美妮，安排黃浩然與馬蹄露嘴對嘴同食一個糯米糍時，黃浩然即指着馬蹄露笑說：「你同美妮好friend㗎，咁益你嘅！」 文：影視組