本文重點
【陳瑋瑜番禺直擊】昨日不時下起驟雨，十位應屆港姐與十二位港男被迫冒雨在番禺長隆水上樂園拍攝《當香港小姐遇上香港先生》特輯，場面頗為狼狽。眾人被安排登上機動遊戲「Ｕ形滑板」，由地面玩到上天，其中(3)鄭寶源踏上滑板，坐了一陣，遊戲未開始已離開，無緣參加拍攝，更被工作人員踢爆未玩已驚到喊。
鄭寶源說：「嚟到見到好高，好驚，平時好少玩。（未玩已喊？）我有嘗試過坐，但唔得，所以唔玩，自己好驚離心力。」她表示未有參加拍攝不會輸蝕，在地面支持其他佳麗一樣開心。
馬詠恩避忌合照
(5)馬詠恩雖然堅持配合拍攝，但玩完後面青青，被問到是否很害怕？馬詠恩死撐說：「我喺澳洲成日玩，唔驚，係啲頭髮凌亂咗。（你好大膽㗎？）幾啦！起碼機動遊戲唔驚，呢個同澳洲差好遠，真係小兒科！」同場的(8)熊穎詩則真正面不改容，連玩三次，大嗌刺激，直言只怕曱甴。
另外，傳出力追馬詠恩的(4)劉倩婷被要求合照，劉倩婷主動叫馬詠恩，反而馬詠恩表現得略為避忌，她說：「我無咁覺得，可能係你哋敏感咗。」