吳亭欣（LuLu）與商人馮潮澤傳緋聞，被筱靖暗寸是「第三者」，因而引發兩人不和，她倆昨首度碰頭，筱靖與其他人成一黨，被孤立的LuLu則傍實高層，不過她們合照時都交足戲扮老友，亞視不找兩人拍劇確實嘥料。
LuLu、筱靖、吳嘉星、黃倩婷及一班男藝員昨以學生Look宣傳外購劇《麻辣鮮師》，傳不和的LuLu、筱靖成焦點，筱靖與吳嘉星及黃倩婷猶如連體嬰，被孤立的LuLu惟有全程傍實高層葉家寶。不過被要求合照時，LuLu與筱靖都表現大方交足戲，難怪有傳亞視向二人訓示過。不過，兩人卻因私下沒甚交流而穿晒崩。
幸早遇挫折
休息兩個月的LuLu以平常心出席宣傳，問她可有被囑小心言行？她說：「冇呀，葉家寶叫我做個乖學生，（之前唔乖？）要重新學習，（同筱靖點？）同佢冇嘢，佢打咗電話畀我解釋，做呢行明白，佢有誠意道歉我都接受。」
至於與馮潮澤的關係，LuLu謂事情與關係都告一段落，不欲多提，但此事令她看清楚很多人和事，且覺得早遇挫折可更早站起來，將來面對困難會懂得處理，至於會否影響搵男友，LuLu說：「我嘅感情生活想低調啲，畀啲空間我。」
忘記夾口供
LuLu雖說筱靖已道歉，但筱靖的說法不一：「冇道歉，我只係今日出席之前打電話畀佢解釋件事，冇必要搞成咁，有唔啱只係之前以為清者自清懶得打電話，大家係同事、朋友冇尷尬，（孤立LuLu，要佢同葉家寶坐咁慘？）咁係我疏忽囉，我都好想同家寶坐㗎。」
文：影視組