蔡卓妍（阿Sa）主演的舞台劇《勁金歌曲》今晚公演，阿Sa昨日以卡拉OK侍應造型現身綵排，舞台劇之故事內容與許志安和前緋聞女友的「廚房宣言」相似，但阿Sa被問及時驚訝表示：「係喎，我真係冇諗到咁似（廚房宣言），不過頭先場戲都幾浪漫！」
驚fans大叫
戴上凌亂假髮及大圓框眼鏡的阿Sa揚言十分緊張，自爆綵排期間仍不時「發台瘟」，她表示：「我呢幾日綵排時連劇中自己個名都講錯，啲記性真係差得好緊要，不過我相信到演出時會順利！」阿Sa又說最擔心是屆時會有突發事件發生，她說：「做舞台劇要好集中，不過我啲歌迷坐第一行，我驚佢哋興奮過度會大叫我個名，但佢哋應承咗我唔會，亦希望到時唔會聽到電話響！」
阿媽要撲飛
阿Sa又透露將自己僅餘的小量門票給了婆婆、嫲嫲和公司同事，但母親卻要四出撲飛，阿Sa說：「我媽咪只有六張平價飛，仲要係分開座位！」問阿Sa有否邀請緋聞男友鄭中基捧場？她笑言：「費事理你！（阿嬌呢？）佢有時間就嚟！」另外，阿Sa在劇中有多個造型，她自嘲其中一個造型似卡通人物Keroro，十分抵死！
文：音樂組