九樓飛躍‧元華命大

據當年親眼目擊事件的元彬說：「嗰次元華喺度翻觔斗，佢話自己係小飛俠，但佢唔為意個窗打開咗，結果就咁飛咗出街，嗰度九樓嚟㗎，好在樓下部貨車啲帆布卸一卸力，救番佢一命，佢落地後一支箭咁標番上樓，不過元華嗰次雖然唔死得，但佢個籮柚因為畀貨車嘅角鐵鑿到，到依家都仲有個凹痕喺度。」

元華這種自殺式行為，死裏逃生簡直是萬幸，任何有腦的人都知不應效法，始終頑皮是要付出代價的。七小福就曾因打架而被拉上警局，險些身陷囹圄，幸最終得「俠女」出手打救。

有份參與當年糾眾打鬥的二師兄元泰說：「嗰次我同三毛、元彬喺街畀人鬧『光頭仔』咪同人打交，仲打爆咗人哋個鼻，結果成班人被警察『的』晒返差館，仲話要搵屋企人嚟，我哋咪搵于素秋囉！師姐一嚟到，啲警察對眼發晒光，嗰時于素秋已經好紅，啲警察見到佢當佢神咁拜，佢哋同師姐行埋一邊傾咗幾句，跟住就放我哋走。師姐冇鬧我哋，佢都唔敢話畀師傅知，費事師傅又發火打人。」

有人忌諱光頭，對光頭仔不問情由地恨之入骨，元彬憶述：「嗰時我哋由學校出發去荔園，會一個拖住一個行去佐敦搭車，每次行到去佐敦道，就會有人搵啲一毫子掟我哋個頭，望上樓睇，原來有班長毛飛喺大廈頂樓打賭，睇吓邊個眼界準啲，掟中個頭就算贏，我哋個頭殼梗係受罪，不過佢哋企到咁高，我哋都冇得尋仇，執起地下啲一毫子咪走人囉！」

光頭受辱‧巧遇仇家

儘管七小福當年吃了「頂上虧」，然而多年後卻有緣與仇家相認，元彬續說：「廿幾年後，有日我開工拍《古惑仔》，同吳志雄、李兆基講起呢件事，佢哋話『你就係當年嗰班光頭仔，累我輸咁多錢，係咪打得少？』，你話世界幾細呢！」（十八）