在戲台上試過表演高難度連踢十二支紅纓槍的于素秋，五十年代由戲台轉戰影壇，憑其於京劇浸淫多年的刀馬旦根底，迅速成為銀幕上炙手可熱的新進俠女，卻不改她外剛內柔的個性。

紅而不驕‧清早教戲

元秋憶述當年跟這位在影壇紅極一時的「俠女」學戲經過，她說：「我同另外幾個師妹都有幸跟師姐學過戲，師姐份人一啲都唔惡，當年佢教過我一套叫《十三妹》嘅戲，嗰時我一大清早就要上到太子道師姐屋企，通常佢會一邊化妝，一邊教戲，嗰時冇劇本，師姐會先唱幾句，然後就叫我記住，佢會話『你留心聽着，用心記着，回去要好好練習，多下苦功，下次唱給我聽』，師姐好好人，從來都唔會打我、鬧我，所以我特別鍾意跟師姐學戲。」

元秋喜跟于素秋學戲，當然還有其他誘因，元秋說：「好多時上到師姐屋企，撞啱佢工人竹姐做緊早餐，師姐會主動話『竹姐，多舀一碗給她』，咁我又有得食埋一份，嗰時只知道跟師姐學戲，可以唔使上天台日曬雨淋練功，又有得食好嘢，所以我跟師姐學戲好用功，從未試過佢教完我，而我下次返去係會唔記得嘅！」

銀幕俠女‧無妄之災

雖然于素秋對小師妹愛護有加，但一次元秋卻間接累她受皮肉之苦，元彬說：「嗰時我哋排戲，元秋耍鞭耍極都耍唔好，咁啱于素秋拍完戲返嚟，師傅叫佢示範，點知師姐將條鞭耍到跌咗落地，師傅粒聲唔出，執起條鞭一嘢就飛埋去師姐度，我哋個個嚇到呆咗，做《白骨陰陽劍》嗰個于素秋喎，嗰時師姐都差不多三十歲，都要被師傅打，打完仲要同師傅講『阿爸，對不起』，嗰次之後，元秋唔敢再跌鞭。」

（十一）