賭王三太陳婉珍的幼女何超蓮昨日偕同朋友在銅鑼灣逛街時，碰巧路經李蘢怡出席活動的地點，並貫徹一向大方可愛的性格，應記者要求停下拍照訪問。一身古銅色肌膚加上以熱褲及小背心示人的超蓮，散發青春性感的一面，難怪拍照時引起途人圍觀。自言前日才由英國返港的超蓮，直言膚色是噴上去。「呢隻係fake tan，係七日spray，（點解唔太陽曬？）我驚曬到一撻撻呀！」她更笑言下雨也不會甩色。

一年前的超蓮還帶點少女味道，與昨日現身鬧市的她截然不同。

把皮膚噴上古銅色的超蓮，昨日以熱褲及小背心與友人到銅鑼灣行街。

自豪有「爸爸鼻」

明顯比前更弗的超蓮，連輪廓也分明，鼻子也比前高，記者笑問超蓮是否整容，她即側身指着鼻子，自豪的表示擁有「爸爸鼻」，並詐嬌說：「梗係唔係啦！你哋由細睇到我大，都知唔係啦！我個鼻係爸爸鼻，同爸爸一樣。只係黑咗睇落嚟好似瘦咗啫。」

媽咪唔准太性感

當記者指她真的比前更瘦，超蓮聞言即難掩興奮，十分開心摸着面龐並反問記者：「係咪㗎？真㗎？哈哈哈！我唔識減肥，成日都食糖，可能之前考試有壓力啦！反而媽咪話我肥咗。」對於一身性感的打扮會否擔心惹來途人注目，超蓮指着心口說：「今朝媽咪已經話咗我嘞，話咁着唔得，要我加番件褸同埋個tube，本來入便無tube㗎，依家件褸擺喺車。天氣好悶熱，你哋唔覺咩？」

回港放暑假的超蓮，說會做暑期工，至於是甚麼工種，她則保持神秘說：「哈哈！我驚講出嚟啲記者會日日喺樓下等我，（父母安排定係自己搵？）遲啲先公布啦。返工唔怕辛苦，當練習吓。」她續說現在冇男友，並攬着身旁的好友說：「有朋友陪我就得啦！」

文：名人組