正生書院前日在梅窩舉行諮詢大會，該校校監、校長帶同約30位學生出席，怎知諮詢會卻變了居民批鬥大會。梅窩居民一窩蜂反對正生書院遷往梅窩，甚至有個別人士指罵學生是「吸毒仔、吸毒女」，學生們改過之心被無情踐踏，難過得痛哭人前！

望與學生見面

學生們一串串的眼淚、一聲聲的哀泣，觸動了祖兒的心靈，她懇切希望梅窩居民能寬容對待知錯的學生：「睇完報道之後，覺得小朋友好善良，唔係大奸大惡，佢哋只係一時貪玩，唔知後果咁嚴重，希望大家幫助曾經行差踏錯嘅年輕人，畀機會佢哋改過自新，走入正途，將來回饋社會。」

由於青少年濫藥問題日益嚴重，祖兒認為社會更應該幫助他們迷途知返：「雖然佢哋曾經走歪路吸毒，但咁細個已經識回頭是岸，點解唔畀機會呢？將來呢班小朋友就係社會嘅中流砥柱。」至於梅窩村民激烈反對正生書院遷入，祖兒嘆說：「明白居民感受，但睇到報道之後，我覺得學生係真心改過，希望大家用愛心包容佢哋，畀小朋友一個讀書環境，有機會我都希望同學生見面，支持佢哋。」

明白居民感受

至於有「古Sir」之稱的古巨基，對正生書院的學生更加無限支持：「好明白居民同小朋友嘅心情，自己睇到報道，覺得小朋友大部分好純良，好希望梅窩街坊畀機會學生投入正常社區讀書。」基仔認為學生錯而能改，善莫大焉，不過他亦體諒居民的憂心：「明白居民擔心，但希望大家用個心對小朋友，佢哋表現好勇敢，面對傳媒都冇垂低頭，證明佢哋誠心改過，見到佢哋被拒絕而流眼淚，覺得現實真係好殘酷，希望大家能夠用心包容！」

雖然學生前路茫茫，但基仔鼓勵他們：「希望學生唔好遇到挫折就放棄，要努力為自己爭取，用時間、真心證明畀大家知，已經疏遠壞朋友，決心改過。」

文：音樂組