08/06/2009

播放本新聞相關短片

伊健GiGi同場不相見

林子祥(Lam)前晚尾場演唱會,造就過氣情人鄭伊健和梁詠琪(GiGi)分手後首度同場,不過緣盡的兩人卻無緣碰面。而61歲的阿Lam盡顯超班唱功,聲震紅館,輕易地唱贏側田。

一連兩場「十分十二子祥演唱會」前晚在雷動掌聲下結束,「過氣情人」伊健和GiGi亦是捧場嘉賓之一,兩人自三年前分手後,前晚首度同場出現,GiGi和媽咪睇騷,伊健就和助手捧場,不過雙方前後腳入座兼一東一西分開坐,緣慳一面,看來二人真的緣盡。其他捧場藝人包括葉蒨文(沙麗)好友朱玲玲、老公羅康瑞及周慧敏等。

側田唱到跪低

至於表演嘉賓就有側田和張敬軒,側田黐假鬚扮阿Lam唱歌,不過觀眾就反應不太熱烈。之後兩人合唱《數字人生》,雖然側田在新一輩歌手中算是唱得之人,不過拍埋阿Lam就慘被比下去,側田因為唔夠氣唱到幾乎跪低,最後還大嗌:「冇氣!」而軒仔就指阿Lam似「大哥哥」,阿Lam風趣說:「好在冇話似daddy。」

封嘴唔講緋聞

沙麗一直在控制台撐老公,沒有上台唱歌,不過阿Lam就遙望老婆高唱《我愛你》。完騷後兩公婆雙雙出席慶功宴,阿Lam因為唱到力竭聲疲,由老婆沙麗代言。記者笑阿Lam對她唱情歌,沙麗扮懵說:「乜呀,傻嘅!(兩晚都喺控制台支持,粉碎婚變傳聞?)無論傳聞點,每次都係喺控制台。」再問她感情是否不受緋聞影響?沙麗則作出拉鏈狀,示意封嘴。

文:音樂組