一連兩場「十分十二子祥演唱會」前晚假紅館開鑼，屢傳婚姻亮紅燈的阿Lam和太太葉蒨文（沙麗），前日黃昏分別為個唱進行拜神儀式，阿Lam伴隨年邁母親誠心上香，沙麗則另外與工作人員拜祭。個唱上，沙麗和阿Lam跟前妻所生的兒子林德正全程站在控制台支持，前晚往捧場的除阿Lam和沙麗的親人，圈中人包括Eason、許志安、蘇永康、車婉婉、農夫及黃耀明等，張敬軒則任嘉賓。
懷念石堅
開場時，大螢幕播出《愛到發燒》MV，MV內有多位巨星客串，包括梅艷芳、羅文、張國榮、徐小鳳、張曼玉及劉嘉玲等，阿Lam則從升降機升上台，一口氣唱出廿分鐘串燒歌後，阿Lam一臉感觸手指指說：「我仲記得當年張國榮坐呢度、梅艷芳坐呢邊、羅文坐呢度。」他續說：「睇新聞知道我偶像石堅叔都去埋，我同佢拍過戲，佢係一個最好人、最好人嘅壞人，好掛住佢。」眼泛淚光的阿Lam隨即唱出《邁步向前》獻給偶像。
阿Lam又言：「紅館發生過好多事，我喺呢度亦發生過好多事（指墮台事件），最後見阿梅亦喺呢度，喺佢最後個演唱會上聽佢最後唱我寫畀佢首歌，大家要學學呢首歌《抱緊眼前人》。」之後阿Lam再唱出《情深別再提起》，憶起故友的他忍不住流淚。接着張敬軒上台與阿Lam合唱，並遞紙巾給他抹眼淚。
奔跳上台
期間，阿Lam望着台下的Eason問道：「想唔想唱歌？」全場即起哄，Eason即奔跳着上台，阿Lam寸Eason一身睡衣Look，Eason反駁：「2010年會興。」阿Lam續說：「點解我留言請你做嘉賓你唔覆？」Eason解釋：「因為我聽唔到你講嘢，同埋我又飛嚟飛去。」二人繼而合唱《數字人生》，Eason唱完後笑言邊唱邊漏氣，又反問：「有冇酒塞？」阿Lam隨即鬼馬地看其屁股說：「你得前後兩個地方漏氣。」阿Lam再掀起Eason外衣，令其露底又露肚腩，不過Eason還哈哈大笑。
文：音樂組