【衞紫敏澳門直擊】基仔加盟英皇旗下備受重視，繼上月底北京開記者會後，前晚在澳門再度舉行簽約記者會，除老闆楊受成親自撐場，並出動私人飛機接載基仔飛赴澳門外，英皇一姐容祖兒和阿嬌為歡迎基仔加入英皇大家庭，率領14位歌手泳兒、陳偉霆、吳浩康、洪卓立、關智斌、張致恒、鍾舒漫、李逸朗、詩雅、湯怡、扈佳榮、陳家樂及王凱駿，在記者會上助興演出，場面星光熠熠。
互讚歌王歌后
一眾歌手唱畢基仔的名曲《友共情》後，台上便播出基仔乘坐私人飛機片段，而身穿全套湖水綠色西裝的基仔如步出機艙般在台上出現，行政總裁吳雨則送上巨型Landing Pass和職員證，以示基仔成為英皇新成員。而悉心打扮的祖兒和阿嬌現身台上祝賀，祖兒和基仔更情熱擁抱，祖兒開心表示終等到與基仔同一間公司，兩人更互笠高帽，又互送榴槤和山竹（果王果后），喻作歌王歌后。
祖兒對於基仔加盟英皇興奮地說：「我哋都一索得男，呢個男仲識同我哋賺錢添。」基仔準備籌備劇本，可自薦做女主角？祖兒和阿嬌即改口叫「基哥」，笑言會尊重長輩，一切交由「基哥」來決定。問到祖兒可羨慕基仔有千萬薪酬？祖兒謂：「公司多年嚟待我不薄㗎，我唔會唔開心，又唔會唔抵得嘅，反而要畀基仔有歸屬感呢。」
下一目標執導
基仔先後在北京及澳門舉行大型簽約記者會，深受英皇器重，他坦言感覺像舉行巡迴簽約記者會，更表示會努力作出回報。問他是否已為公司賺回二千萬過檔費？基仔笑道：「呢個係陷阱問題喎，我唔會答幾多錢，總之係滿意銀碼，除價錢之外，最重要係未來合作計劃，而每個階段有自己目標和夢想，希望下一個係達成做導演夢想。（吳雨話幫你蟬聯最受歡迎男歌星獎？）我會做好手頭上唱片，其他嘅事就交畀公司。」
身為英皇一哥，會否押後婚期？基仔很大反應：「乜呀，講我咩，講Mani咋，我仲細，未到談婚論嫁喎。」講到未見緋聞女友兼助手Lorraine出現？基仔笑言：「得力助手？佢有嚟到。（工作上有冇改變？）我依家有得力經理人Mani，有得力ＣＥＯ吳雨，而得力助手就會幫我處理設計（基仔設計的公仔Kubi）方面嘅工作，演藝上嘅嘢會全權交畀得力經理人去搞。」