○七年亞洲小姐冠軍張家瑩（Grace），原來屋企盛產冠軍，與她相差八年的弟弟張溢豐也是乒乓球冠軍級人馬，雖然二人相聚時間不多，但姊弟情深，不時互相鼓勵。
Grace生於小康之家，有兩個弟弟，她與最小的弟弟溢豐同樣遺傳了運動細胞，原本Grace游水、排球、乒乓球樣樣皆能，只是媽咪怕她太高、太健碩，不再讓她運動轉而學跳舞，所以見到溢豐進身成為香港代表隊，都替對方開心。
難得弟弟有抱負
跟溢豐感情特別深厚，因Grace多了一點「母愛」：「同佢相差八年，所以佢出世就當玩具咁，爭住餵奶，而且佢好乖，好少喊又成日笑哈哈，同我又似樣，雖然後來我去咗英國讀書七年，分隔兩地，但感情都冇疏離。」
溢豐八歲開始打乒乓球，在名校讀至中三那年，就決定做全職運動員，與學業同時兼顧，Grace覺得弟弟年紀小小難得已有抱負，故大力支持，結果溢豐不負眾望，早前贏得「中國乒乓球俱樂部乙Ａ」冠軍，現常留在內地集訓。
各有各忙互支持
雖然兩姐弟各有各忙，但溢豐會錄影家姐演出的節目，甚至前年Grace選亞姐，溢豐盡量不讓家姐看到其負面新聞，望她更有信心，Grace讚道：「我嗰時着唔慣高踭鞋，雙腳起晒水泡，細佬就幫我治理。雖然我係家姐，但佢成日都窒我，呢啲咪係『姊弟情深』囉。」
文：影視組
攝：林蔚恩