一向企定定做model居多的郭穎橋，原來是名攝影發燒友，她希望不久將來能推出一本個人相集，而貴為樂壇新貴的她早前更在哥哥的婚禮上獻唱，令阿嫂感動落淚。
夏日炎炎，不少靚模都把握機會拍攝性感水着寫真，趁青春留倩影，問到郭穎橋（阿橋）會否乘勢於今年出寫真時，她笑說：「我都好鍾意扮到靚一靚畀人影相，但係我身材有待進步喎！若果真係出寫真，我希望以型格為主打，泳衣我都唔抗拒，形象陽光健康就ＯＫ！」
望推出個人相集
原來阿橋本身就是名影相發燒友，相比起推出個人寫真集，她更想擁有一本個人相集，她說：「我好鍾意影相，覺得可以留住影嗰一刻嘅心情。其實連本相集點設計我都諗好㗎啦，最好設計成一頁頁明信片咁，可以搣落嚟送畀人，又可以擺入相架自己欣賞！」
狂練習緊張失眠
早前阿橋的哥哥結婚，剛踏入樂壇不久的她，擔任婚宴上的表演嘉賓，在色士風的伴奏下為嫂嫂獻上情深款款的英文情歌，阿橋更指表演前緊張得失眠：「我好少唱英文歌，所以之前都特登搵老師幫我練習。呢次係我第一次喺親戚面前唱歌，真係超級緊張，前一晚仲緊張到食唔落嘢又瞓唔着！不過嗰晚阿嫂聽到首歌感動到喊，我就覺得自己呢份結婚禮物真係揀得好啱！」
採訪：專案組
攝影：黎志輝
化妝：Johnathan Y.
髮型：Cooney@Pop Hair
服裝：Rosebullet
場地：Van Gogh Kitchen