林敏驄與張達明早前合作拍攝馬會新宣傳短片，二人發揮搞笑本色，以Mark哥及蠱惑仔造型亮相。向來貪玩的阿驄及達明在等拍攝期間，更即興玩波仔打發時間，認真大細路。之前曾與趙碩之合拍宣傳片的阿驄，笑謂這次與達明合作十分失望，他說：「上次同碩之拍得幾開心㗎啦，我今次都滿心期望以為可以同啲咩性感美女合作，點知彈個張達明出嚟，真係好失望。」
由於宣傳片內容與合法賭波有關，問到二人私底下有否與朋友牙骹戰時，達明即大爆內幕：「我就好少賭，最多平時同吳鎮宇、劉青雲、張家輝佢哋玩吓Poker，鎮宇係水魚王嚟㗎，因為佢成日亂咁去，所以次次同佢玩都會贏；而咁多個之中，以青雲最勁，因為佢玩得夠冷靜。」
