李彩華早前到溫哥華、多倫多等地方作慈善演出，雖然當地受到豬流感（H1N1甲型流感）疫情影響，但仍無損阿Rain心情，除跟同劇的黃凱芹、蔡少芬等培養出友誼，還於當地欣賞到粉紅櫻花！
李彩華（阿Rain）日前到溫哥華、多倫多等地，巡迴演出音樂劇《戀愛猜情尋》，為「加拿大世界宣明會」作慈善演出，此行對阿Rain來說甚具意義，既能替蒙古患了軟骨病的兒童籌款，也令阿Rain跟同劇的蔡少芬、黃凱芹、陳鍵鋒等建立深厚的友誼。
無懼流感
今次加國行還有一大得着，就是可以看到櫻花，阿Rain表示：「以前通常只會喺日本見到櫻花，喺加拿大睇櫻花都係第一次！雖然好多人都話美加有豬流感好危險，但我哋喺加拿大就覺得好舒適，小心之餘，大家都忙着演出嘅事，疫情完全冇影響到心情。」
似小忌廉
阿Rain於舞台劇上，要佩戴五顏六色的假髮，造型十分卡通，阿Rain笑言：「啲假髮好誇張，大到令我高咗成呎，不過同其他演員一齊戴假髮，好有舞台效果，工作人員仲話我似卡通片角色『小忌廉』！」演出期間，令阿Rain覺得最搞笑的便是假髮的尖啄，在台上經常刺到陳鍵鋒的面，她笑言：「因陳鍵鋒常常取笑我，所以啄佢囉，當報仇啦！」
文：影視組