本文重點
崔建邦被本報獨家拍得拖女夜蒲後，昨午即帶同正印女友唐詩詠與陳志雲食齋解畫，崔建邦解釋當晚狂剿女伴手袋，因對袋中的Love Letter（情信）有興趣而已，唐詩詠亦表明唔信男友偷食，至於陳志雲亦力撐崔建邦沒有偷食，更安排愛將孭飛主持少年版《志雲飯局》。另外，有讀者踢爆崔之長腳女伴為模特兒。
身為陳志雲愛將的崔建邦，上星期被本報獨家拍得與「鐵腳」側田拖女夜蒲，有關報道出街後，昨日崔建邦馬上帶同正印女友唐詩詠與陳志雲在黃大仙食齋。
現場所見三人亦談笑甚歡，特別是唐詩詠不時開懷大笑，反而崔建邦表現有點拘謹，而陳志雲則搭着愛將合照，以行動力撐到底。
問到崔建邦女友有否向他大興問罪之師？他以充滿創意的口脗說：「佢冇嬲，呢啲大家明啦！摷手袋係因為側田話每個Chanel袋都有個位放Love Letter，咁我真係摷到有封Love Letter喎！」
對男友夜蒲「
女」一事，唐詩詠不但冇嬲，反而投信任一票，她謂：「點解要嬲？每個人都有私人空間，去玩都好正常，而且佢都有同我講跟側田飲嘢，啲相都冇咩，佢亦有解釋摷袋嘅相，只係話跟側田睇吓個袋入面嘅隔位！（今日三人行食飯肯定正印地位？）都係朋友啫！」
崔建邦的解釋雖然似有牽強之嫌，但就成功贏得陳志雲信任，並宣布落實由崔孭飛主持少年版《志雲飯局》－－－《My Name is 邦》，陳志雲說：「嗰日崔建邦去飲嘢都有知會我，佢話側田同佢補祝生日，我完全唔覺得篇報道會影響崔建邦形象噃。」
頭炮搵側田
陳志雲續說：「我頭先就同崔建邦傾，節目頭炮嘉賓就搵側田，等佢哋傾吓去夜蒲點樣先唔會被人話係去女，另外亦都計劃搵唐詩詠上節目，撮合佢兩個多啲幕前合作機會呀！」但當問到會否邀請向來緋聞多多的徐淑敏，以崔建邦緋聞女友身份上節目，陳志雲則笑而不答。
此外，昨日有讀者報料，被崔建邦發現有Love Letter的長腳「邦女郎」，原名陳詠楠（Wing），曾任港聞記者，現任模特兒，五呎八吋高挑身材配32B、24、34標青三圍，比堅尼水着Look深受網友愛戴，更為她開設討論區，封為噴血女神！
文：影視組