將於下月舉行首個紅館演唱會的林峯，前晚在泳池邊舉行個唱記招，由四名性感比堅尼女郎陪同下出場，獲四女獻吻的他表現生硬兼狂標汗，林峯事先張揚為配合透視造型，屆時會穿T-Back演出。
演而優則唱的林峯將於下月十七及十八日假紅館舉行處男個唱「峯‧情無限演唱會」，前晚在泳池旁邊舉行記招造勢。唱片公司高層霍汶希及無綫高層樂易玲到場支持，盡顯萬千寵愛。一身便裝打扮的林峯，由四名性感水着美女陪同登場，不過林峯全程目不斜視，獲四美送香吻時更標晒汗兼唔敢郁，表情尷尬猶如怕醜仔上身。記者笑他好艷福，「驚魂甫定」的林峯只懂傻笑回應。
紅館開騷以為發夢
林峯坦言這次在紅館開個唱以為是發夢，他說：「我覺得好刺激，因為紅館係好多歌手嘅夢想、終極目標，之前自己都懷疑係唔係真，到今日（前晚）先好肯定下個月開。我都覺得出兩隻碟就開好快，但係公司同TVB都覺得係好時機，加埋今年係我入行十年，唱片銷量又一隻好過一隻，自己都有信心。（有冇賣飛壓力？）唔會，公司會Take Care。」
他又稱會考慮唱緋聞女友鍾嘉欣的歌：「最緊要畀大家知我平日鍾意唱咩歌。（唔唱即係唔鍾意？）我想試吓唱未唱過嘅，好似hip hop嗰啲。」今次林峯的個唱會以健康性感造型示人，問他可會穿泳褲？他謂：「紅磡體育館真係睇肉咩？我會着See Through，若隱若現。（邊個部位先？）成個人。（T-Back呢？）See Through梗要着T-Back啦！」他更事先張揚會有濕身演出。
或邀鍾嘉欣做嘉賓
問可會邀請鍾嘉欣任嘉賓？林峯反問記者：「你哋想請佢？」身旁的樂易玲即表示要度期。演唱會嘉賓已落實的有謝天華、泳兒及蔡卓妍，林峯說：「我最想偶像學友嚟睇！」
文：音樂組