何韻詩落實演出無綫月底開拍的新劇，飾演高級經理，據知，無綫兩度向她招手拍劇，更出動高層樂易玲親自打電話，阿詩見無綫盛意拳拳，縱使要為十月個唱做準備也一口答應。
與偶像結緣
近日阿詩除忙於灌錄廣東碟及國語碟，又要籌備十月的個唱，檔期密密麻麻忙得不可開交，但日前她已答應無綫演出新劇《辦公室女王》，做汪明荃的女兒，同劇還有黃宗澤、吳卓羲及杜汶澤等人。
據可靠消息稱，無綫透過唱片公司向阿詩招手，起初因檔期問題被迫推掉，無綫以角色很適合她，再三商量後由高層樂易玲親自出馬聯絡阿詩經理人，阿詩已多年冇拍劇，角色有發揮又與偶像阿姐合作，終被誠意打動答應演出。
為髮型苦惱
現時阿詩既要為新專輯影封套，又要配合角色，為髮型十分煩惱，因此與髮型師開會研究，曾一度打算戴假髮。問會否駁長髮以配合高級經理角色？阿詩笑說：「高級經理唔一定要長髮㗎，不過真係有考慮過戴假髮，要視乎靚唔靚啦，再會同髮型師、無綫商量。（會唔會着裙演出？）未知道，但會以ＯＬ look示人，總之到時大家咪知囉！」目前豬流感（Ｈ１Ｎ１甲型流感）肆虐，演唱會會否延期？她指機會不大：「應該唔會喇，最多呢幾個月辛苦啲。」
文：音樂組