剛從北京完成新戲返港的余文樂，隨即準備「見鬼」。北京之行令他夢想成真，難怪雖然冇啖好食兼險些凍死，但仍深感「物有所值」。
阿樂剛拍竣羅志良新片《荒村公寓》，一向對幕後工作甚有興趣的他，終於有機會一償宿願，他說：「試過揸咪學收音，又有機會roll機扮導演拍咗一個鏡頭，感覺好興奮，我叫導演點都要keep住用呀！」
冇啖好食出錢慰勞
由於攝製隊於北京近郊取景，送來的飯盒往往瞬間變凍，根本不能下嚥，阿樂臨返港前決定自掏腰包，慰勞一班「戰友」，他說：「日日對住十幾廿粒鐘，最難得係相處愉快，感覺好似一家人，冇所謂啦。」
談到此行最難忘的事，阿樂謂：「試過有場戲，導演要求我同女主角張雨綺落水，當時零下兩度，成池都係冰水，凍到我哋冇晒知覺，最慘係上水後孭住成身濕衫，冚幾多張氈都冇用啦。」
友情價再拍楊丞琳
返港不久又要準備接拍彭氏兄弟「見鬼系列」的《童眼》，與楊丞琳扮演一對，想不到電影未拍已給人大做文章，指他割價接戲，阿樂沒好氣說：「我接呢個角色，主要因為電影公司好有誠意，一早都知道只係友情客串，其實自《愛情白皮書》後能夠再次同楊丞琳合作，覺得大家都成長咗好多，希望可以帶畀觀眾新鮮感。」
至於傳他約滿藝能後有意跳槽，阿樂淡然表示，不是事實不回應。
文：影視組