張敬軒的新碟由七大名師監導，在製作錄音過程中難免會有壓力，更有戰戰兢兢的感覺，軒仔又深得倫永亮（Anthony）賞識，甘願自掏腰包購買軒仔的大碟。
軒仔的新碟《Love & Living》親自找來七位大師級人馬監導，包括林子祥、倫永亮、徐日勤等，軒仔繼之前與Anthony合唱後，今次再邀Anthony為他作了兩首歌，笑言跟Anthony合作感覺挺開心：「Anthony有名叫笑料王，合作真係好開心，笑聲不絕。」
讚賞新人
熱愛音樂的Anthony，雖然對新一輩歌手認識不多，但對軒仔深表讚賞：「佢第一張碟我已經自發性去買，仲有衞蘭，因為覺得佢哋唱得好。」Anthony也不忘讚賞近年人氣急升的謝安琪、台灣歌手王若琳，對她們的歌聲都有較深印象。
運氣重要
軒仔坦承跟這班大師合作有一定壓力，他說：「出於本能見到呢班前輩時會戰戰兢兢，怕自己做得唔夠好。」又感激環球對他的支持，捨得花費為他製作新碟。《酷愛》一曲令軒仔歌唱事業爆紅，他承認變成「負擔」，他說：「做呢行運氣真係好神奇，呢首歌受歡迎程度完全超越我想像，最初完全冇揀呢首歌作派台歌，亦有人笑我呢首最hit嘅歌竟然唔係出自我手，所以我會試吓轉型，減少創作做純歌手。」
文：音樂組
攝：馬永堅
服裝：Initial
場地：DIVO Wine & Dining