出爐影帝張家輝經過連場慶祝後，日前已聯同導演林超賢出發到意大利烏甸尼斯影展，為電影《証人》造勢，人逢喜事精神爽，近日家輝經常四萬咁口，但原來他獲獎前一周，曾在死亡邊緣徘徊。
家輝與張靜初早前為電影《紅河》，於北京、昆明、大連及成都等地展開為期一周的巡迴宣傳，抵達大連時，眾人即往品嘗當地馳名海鮮，當中如手掌般大的螺令家輝食指大動，於是一連吃下兩隻，為防貝殼內裏藏有細菌，家輝已取出螺的內臟，不過食物未落格，他已感到視力不能集中，他看到的事物也很模糊，令家輝慌張非常。
致電問醫生
為免影響眾人的興奮心情，家輝扮若無其事走入洗手間，不斷以清水洗面，又用手按摩雙眼，但情況未見好轉。
家輝情急下致電回港找家庭醫生，怎料醫生說的一番話令他驚上加驚：「醫生話我控制唔到眼神經，應該係個腦有事，勸我即刻做腦掃描。當時我諗好多嘢，甚至乎負面嘅畫面都湧晒出嚟。」雖然如此，家輝仍頂硬上隨大隊到戲院宣傳，期間還不斷「灌水」，望視力恢復清晰。
捱足兩小時
幸好，經過兩小時的煎熬，家輝的情況已大有改善，令他放下心頭大石：「真係驚餐死，我以為我就咁『玩完』，仲傳埋短訊畀老婆。後尾同工作人員講番，原來嗰晚食飯其中一位哥哥都有我咁嘅情況，呢啲叫食物中毒，我諗唔係我係咁『灌水』沖淡番，就真係係咁先嘞！」
文：影視組