自「啜爆張茆」事件後，經歷「先分後婚」的倪震與周慧敏（Vivian）昨日出席其開設的桌球室開幕儀式。兩夫妻心意相通均封口拒提張茆，而倪震則強調與Vivian財政獨立，沒有用對方錢搞生意，賺錢都不會分給老婆。
昨日倪震有份投資的桌球室開張，倪匡夫婦、狄波拉、古巨基、鄭中基、戴夢夢、王馨平夫婦及谷祖琳等均出席撐場。雖然倪震與Vivian沒戴上婚戒，但表現恩愛，倪震在傳媒起哄下更即場親吻Vivian臉頰。問倪震擔不擔心被指是Vivian打本做生意時，他說：「公道自在人心！（賺到錢一齊使？）唔係，都係經濟獨立，感覺係一條數，冇計邊個畀咩錢。」
夫妻封口拒提張茆
倪震興奮地說，會設VIP卡打折給好友，問到張茆捧場時會否擁有VIP待遇？他說：「唔回應喇！」對於會否拒絕張茆捧場，以及是否跟Vivian共識不談張茆的問題，倪震亦封口表示：「真係冇回應，唔好意思！」
而Vivian甫見記者便主動說：「千祈唔好話我有份投資，呢度係阿Joe（倪震）同另一拍檔投資，我絕對冇參與。（倪震係咪修心養性搞生意？）佢不嬲都修心養性。」對於有傳張茆「暗交」倪震，Vivian與老公口徑一致地說：「冇回應！（完全信任老公？）當然啦！」
雖然倪震和Vivian封嘴避答張茆，但倪匡卻對此高談闊論。倪匡說：「佢一向好定性，不知幾生性。（去蘭桂坊咀女仔都生性？）去蘭桂坊唔咀女仔，唔通講聖經咩！」身旁的狄波拉亦插嘴幫拖：「咀條仔就唔好啫！」
去蘭桂坊齋玩唔咀
倪匡稱不會要求兒子婚後絕迹蘭桂坊，他笑笑口說：「可以唔咀！」他又稱不會教新抱Vivian箍實倪震的招數，他說：「兩公婆講感情唔講箍，男人千祈唔好箍，箍唔住！」倪震對於父親暢談其「濕吻」事件，只好尷尬地表示：「冇回應！」
文：音樂組