年僅17歲的胡心諾，因與小方鬧緋聞而成功出位，未知是否樹大招風，Rainbow成為眾矢之的，更熱爆不少網站及討論區，與城大學生妹張茆的遭遇近似。
與TB影「蜜」照
本報發現早於去年中，有網民發起「反胡心諾大聯盟」文章，更以「豬扒」及「毒姑」來形容Rainbow，又力數她六條罪狀，包括吸煙兼有惡習、無心向學、發明星夢、流連夜店、搞TB（Tomboy）及製造新聞博上位等。
此外，本報亦在網上發現不少Rainbow的私生活照片，包括豎中指（不文手勢）相、學生相、性感泳照、與TB親「蜜」照、素顏Look、索爆夜蒲照及快餐店兼職的工作照等。有網民更將其夜蒲照「惡搞」，配上搞鬼對白，指「『吸並』（Clubbing）真係有益身心健康，你睇我哋就知。」認真抵死。不過，Rainbow接受完《東張西望》訪問後，亦有網友留言支持她。
對於被翻舊帳及有關「指控」，Rainbow的經理人Admond說：「佢都知呢件事，佢冇唔開心，不過我覺得好正常，佢啱啱出道，實有人支持及有人反對。」Rainbow被指是「壞女孩」一名，吸煙兼無心向學，Admond說：「相信佢唔會，（舉中指影相？）細個入Camp時貪玩，嗰時年紀比依家仲細。」談到與一名TB影「蜜」照，他說：「都係小朋友玩貼紙相，依家好多人都係咁嘅打扮，佢會學乖，我哋會悉心教導佢。」
梁漢文撐小方
而與方力申合作《美女廚房》的梁漢文（Edmond），前晚出席一個酒吧活動，則力撐好拍檔，又替對方不值，Edmond說：「我目睹成件事經過，當日係個女仔問小方攞電話，小方係人都畀電話啦，依家受到教訓，唔好任何人都畀電話號碼，fans要又畀。」
至於Rainbow有否向Edmond索取手機號碼？他笑稱：「可能我結咗婚，所以冇問。（知唔知Rainbow睇中小方？）我唔知，我唔敢講，不過美少女廚神原意係好好，依家演變成咁就唔係幾好，但我諗對小方冇影響。」談到Rainbow會否被「叮」走？Edmond說：「應該唔會，之前拍咗啲片，都唔會變，我諗佢哋再見面小方都唔會尷尬，要尷尬都係個女仔尷尬多啲。」
與Rainbow分屬朋友的模「拉闊Janice Man」顏后君，則力撐Rainbow說：「我覺得佢係小朋友，性格開朗同主動，問小方攞電話好正常。」
文：專案組