Kama、周秀娜（Chrissie）、梁嘉琪及周柏豪昨日出席「衫衫不盡春夏潮服花生騷」，若論性感程度，同樣以吊帶短裙行騷的Kama與Chrissie平分秋色，但Kama的無淚攻勢成功搶鏡。近日有報道指Angelababy擺明與Kama「有你冇我」，拒與Kama同在第一集《美女廚房》亮相，監製只好安排Kama在第三集現身。Kama起初表示對傳聞不知情：「我唔知監製點安排，我唔識個監製。」記者追問她錄影時間有冇改動過？Kama即問身旁的女助手，她表示：「我哋係收到通知去做。」
情緒變幻如天氣
Kama又坦言與Angelababy不認識：「平日工作見到都會閒聊，唔會尷尬。（搵佢了解吓？）傳媒點寫我控制唔到，我都好被動。（是非影響形象？）我咩都唔知，唔知點解成日咁寫我。」記者再問她會否因是非感不快時，原本笑意盈盈的Kama，突然180度轉變，滿面通紅欲哭無淚，女助手即上前護主，當眾人以為她離開現場或入後台休息，Kama卻走到fans堆為他們簽名，後來才折返後台。
半分鐘後，Kama似是平復心情帶笑步出後台供傳媒拍照，記者要求繼續訪問，她認為一直都是被傳媒寫，問她是否感委屈，Kama又谷到面紅紅，以紙巾印眼，但全程未見流淚，只是眼濕濕、扁嘴。女助手代答謂：「好多都唔係事實，畀你都會唔開心啦，多謝你哋。」Kama此時又平復過來，繼續拍照及接受電視台訪問，情緒變化猶如天氣變幻莫測！
Chrissie行騷甩鞋
同場的Chrissie爆Kama甫到場已心情不佳：「見到佢都覺得係有唔開心，不過以為佢做嘢攰，可能我唔夠細心啦，我都唔知咩事，一陣會安慰佢。」她透露行騷時甩鞋，令她行到亂晒，Chrissie笑言：「我今日都唔開心。（靚模好多是非？）我唔係靚模，自己慣咗做完嘢就走，無太多時間同人不和。」另外，首次行騷的梁嘉琪坦言心情緊張，為以最靚一面示人前日更整天禁食。
文：音樂組 攝：謝國華