「美少女廚神」胡心諾（Rainbow）因自爆被方力申追求，隨時在《美女廚房》無得留低。不過其人氣不跌反升，除獲髮型屋廣告垂青搵真銀，日前又與好友「E cup廚房妹」鍾蕙芝（Lavina）齊作兔女郎打扮博翻身！
年僅17歲的Rainbow，日前「衰多口」踢爆被方力申攞電話，隨即被指博宣傳，Rainbow事後堅稱是一場誤會，小方並無追求她。由於Rainbow一直視小方為偶像，加上擔心因此事而被飛出《美女廚房》，及新一輯的《四葉草》，連日來為事件解畫，認真峰迴路轉！
髮型屋邀任代言人
受事件困擾的Rainbow，昨日坦言不開心，並說：「經過今次呢件事學識點處理，希望大家畀個機會我！」不過，一心加入娛樂圈的Rainbow，藉此機會亦人氣急升，更獲髮型屋垂青擔任代言人。日前她與好友「E cup廚房妹」Lavina齊齊卸下圍裙，變身性感兔女郎，認真搏到盡！當時她心情十分輕鬆，更不時跳跳紮，似乎已收拾好心情。
提到擔任髮型屋代言人，Rainbow坦言酬勞滿意，由於她扮演多個不同造型，感覺新鮮，問她會否效法(o靚)模的日本妹打扮，她說：「我又唔會刻意。（想拍咩廣告？）好想試吓拍化妝品廣告。」而擁有36E驕人上圍的Lavina，直言不介意性感上陣，她說：「我覺得兔女郎係性感加可愛嘅化身，自己身材都OK，唔介意健康性感。」
諗唔到會咁大件事
此外，Rainbow昨日接受《東張西望》訪問，提到當時與小方是誰先提出交換電話號碼，她說：「邊個問邊個已經唔係問題，當初交換電話諗唔到咁大件事，（小方話係教訓喎！）少少唔開心，我擔心同佢冇朋友做，下次見面會主動同佢say hi，希望佢唔好介意，對電話唔好有恐懼，今次真係一個誤會。」
至於當日亦有份拍攝《美女廚房》的A.Lin則大爆內幕：「雖然我睇唔到邊個畀電話邊個，但嗰日我遲咗入廠，就見到佢（Rainbow）啱啱錄影完都仲未捨得走，好似好心急咁喺廠外面行來行去，可能就係等緊問方力申攞電話。」
文：專案組 攝：吳文聰
兔女郎服飾及場地：黃金海岸商場