孫耀威剛完成江西探訪後大有體會：「去完探訪之後，再睇番關楚耀呢件事，會覺得係有錢人奢侈問題，金融海嘯都一樣，所以應該學識知足同珍惜，好好過人生，唔好犯錯。（衞詩將上庭？）交畀佢哋公司處理啦！（擔心？）一路都擔心，有幫佢祈禱，做錯事要承擔，希望上天畀條生路佢改過。」
汪明荃的回應為：「要堅強啲，做咗出嚟就要接受過程，希望佢快啲冇事。依家始終涉及到法律問題，咁大個人做事要知道後果，毒品係掂都唔好掂，因為對身體唔好。」
鍾鎮濤得悉衞詩要出庭表現愕然：「咁慘呀。其實我都唔知成件事係點，不過希望佢會冇事，一個女仔喺嗰邊好慘，仲要被拘留咗咁耐。（識對方？）平時都有打招呼。（若寫求情信都會支持？）我同佢都唔同公司。」
陳偉霆說：「我都想知發生咩事，依家上庭就會知道，希望佢快啲冇事，唔好喺日本受罰，因為喺其他人眼中佢係一個外地嘅女仔，多數都唔慣。」
官恩娜：「希望佢冇事啦，其實佢喺嗰度溝通不到，就算探監都唔可以用日文以外語言傾偈，真係好慘，（星途盡毀？）冇諗呢樣嘢，淨係希望佢快啲冇事。」