陳豪谷巨躉自誇有後福

陳豪為拍劇不惜增磅變成二百多磅的「肥豪」,雖然成為他自己歷來最巨身形,不過陳豪冇有怕,更自言肥嘟嘟似足秦始皇。

陳豪、李詩韻、鄭嘉穎及何傲兒等昨日在荔枝角公園為無綫劇《宮心計》拍外景,向來予人型男感覺的陳豪為演皇帝,不惜犧牲形象勁增廿多磅,變成二百多磅的肥豪,他除身材圓潤露出虎背熊腰,就連臀部亦升級為「豪華臀」,難怪陳豪亦指着臀部自嘲有「後」福。

暴肥形象嚇人

陳豪自爆肥豪形象嚇人:「為營造皇帝的飽滿感覺,我刻意增肥,由原本一百八十磅增到依家二百幾磅,係我歷來最肥,個個畀我身形嚇一跳。(廣告客戶有冇詐型?)冇,我着咗西裝唔覺,唔覺唔覺就咁二百幾磅,拍完呢套劇會努力減番。(想唔想拍瘦身廣告?)睇有冇咁嘅彩數,任何生意我都接受。」

李詩韻中文差

此外,鬼妹仔李詩韻說拍劇遇上困難,皆因對白文縐縐、詞彙甚多:「平時劇本啲字,我睇到七成,今次淨係識睇三成。啲中文字好深,因為我小一就過咗加拿大,中文只有小一程度,依家要努力學中文,已經學到小二程度,識寫『船』同『炭』。」

詩韻又謂全家不識中文字:「第一次睇劇本,好多字唔識,諗住攞返屋企問家姐、阿哥,但佢哋又係喺外國讀書,所以唔識中文字,再問阿爸阿媽,佢哋又話唔係好識,所以全家冇人識中文字,惟有問朋友。」自認中文程度差的鄭嘉穎,亦表示對白好深,要靠導演為他翻譯。

文:影視組